Një video e publikuar në rrjetet sociale ka ngjallur reagime, pasi shfaq një efektiv policie duke mbajtur telefonin celular në dorë dhe duke filmuar automjetet e diasporës, teksa ato presin në radhët e gjata për të hyrë në Shqipëri.
Pamjet janë regjistruar në kohën kur mijëra shqiptarë nga Kosova dhe diaspora po udhëtonin drejt Tiranës për të marrë pjesë në protestën e thirrur këtë të shtunë.
Kjo nuk është hera e parë që protestuesit ngrenë akuza të tilla. Edhe në protesta të mëparshme, pjesëtarë të diasporës kanë pretenduar se automjetet e tyre janë gjobitur gjatë hyrjes në Shqipëri.
Një përfaqësues i diasporës e denoncoi këtë situatë edhe nga podiumi i protestës.
“Kemi ardhur për bashkim, jo për përçarje. Sa kohë valëvitet flamuri, keni përkrahjen tonë. Kemi bërë rrugë të gjatë, disa nuk mundën të qëndrojnë sot. Në doganë i kanë bllokuar, i kanë gjobitur. Sot është e diel dhe pagesa e gjobave shtyhet për nesër në postë. Vetëm bashkim dhe jo përçarje”, u shpreh ai.