Në marrëdhënie ekzistojnë çifte që përjetojnë konflikte dhe grindje të forta, por që arrijnë të qëndrojnë bashkë sepse dinë t’u japin diskutimeve një kuptim konstruktiv. Nga ana tjetër, ka edhe çifte që nuk debatojnë kurrë dhe duken gjithmonë dakord për gjithçka. Në këto raste, shpesh emocionet dhe pakënaqësitë shtypen në emër të një qetësie të rreme.
Sipas studimeve, çiftet që nuk shfaqin kurrë pakënaqësi apo zhgënjim janë më të rrezikuar nga ndarja sesa ata që herë pas here shfryjnë tensionet. Shmangia e debatit lidhet shpesh me frikën nga konflikti, refuzimi ose dëmtimi emocional i partnerit. Disa preferojnë një paqe të dukshme, edhe pse të pakënaqur, sesa përballjen e hapur.
Të mos debatosh kurrë nuk është shenjë harmonie, por rrezik për marrëdhënien. Konflikti i shëndetshëm ndihmon komunikimin, rritjen dhe njohjen më të thellë të njëri-tjetrit. Kur pakënaqësitë shtypen për një kohë të gjatë, ato mund të shpërthejnë papritur, duke shkatërruar ekuilibrin e brishtë të çiftit.