Administrata e ish-presidentit Donald Trump po shqyrton mundësinë që t’u ofrojë banorëve të Groenlandës pagesa deri në 100 mijë dollarë për person, me qëllim që t’i bindë të shkëputen nga Danimarka dhe të bashkohen me Shtetet e Bashkuara.
Këtë informacion e bëjnë të ditur burime të cituara nga Reuters, duke theksuar se ideja është ende në fazë diskutimi.
Sipas burimeve, zyrtarë amerikanë, përfshirë edhe figura brenda Shtëpisë së Bardhë, kanë përmendur shuma që variojnë nga 10 mijë deri në 100 mijë dollarë për banor. Megjithatë, detajet konkrete të planit nuk janë konfirmuar zyrtarisht dhe mbeten ende të paqarta.
Më herët gjatë kësaj jave, Sekretari amerikan i Shtetit, Marco Rubio, përjashtoi kategorikisht mundësinë e përdorimit të forcës ushtarake për të marrë kontrollin e ishullit. Ai theksoi se Uashingtoni do të preferonte një zgjidhje paqësore, duke lënë të kuptohet se blerja e territorit do të ishte një opsion më i pranueshëm.
Megjithatë, ideja për pagesa direkte ndaj banorëve të Groenlandës është parë nga shumë analistë si tepër “transaksionale” dhe potencialisht poshtëruese. Groenlanda ka vite që diskuton rrugën drejt pavarësisë nga Danimarka, dhe një ofertë e tillë mund të perceptohet si nënvlerësim i vullnetit politik të popullit.
Reagimet nga autoritetet lokale nuk kanë munguar. Kryeministri i Groenlandës reagoi ashpër, duke shkruar në rrjetet sociale: “Mjaft më… Mjaft me fantazitë e aneksimit”, në përgjigje të deklaratave të reja të Trump për “blerjen” e ishullit.
Sondazhet tregojnë se shumica dërrmuese e banorëve të Groenlandës janë në favor të pavarësisë nga Danimarka. Megjithatë, shqetësimet lidhur me kostot ekonomike dhe pasojat afatgjata të shkëputjes kanë bërë që deputetët vendas të shmangin thirrjet për një referendum.
Po ashtu, sondazhet tregojnë se, ndonëse shumë banorë janë të hapur ndaj idesë së pavarësisë, shumica nuk dëshirojnë të bashkohen me Shtetet e Bashkuara, duke e bërë planin e mundshëm të Uashingtonit edhe më të diskutueshëm.