Gazetari dhe analisti politik Baton Haxhiu deklaroi se zëvendëskryeministrja Belinda Balluku i ka paraqitur dorëheqjen kryeministrit Edi Rama gjatë orëve të para të mëngjesit, por kjo dorëheqje nuk është pranuar. Sipas Haxhiut, akti i Ballukut ka qenë formal dhe i drejtpërdrejtë, i lidhur me zhvillimet e fundit që kanë të bëjnë me raportin e saj me drejtësinë.
Analisti thekson se Rama e ka refuzuar dorëheqjen, duke e konsideruar largimin e saj jo si zgjidhje, por si një problem institucional më të madh. Në këndvështrimin e kryeministrit, pranimi i dorëheqjes do të nënkuptonte legjitimimin politik të një mase procedurale, pa pasur ende një vendim të formës së prerë nga gjykata, duke krijuar një precedent të rrezikshëm për funksionimin e qeverisë.
Sipas Haxhiut, Rama nuk po e trajton rastin si mbrojtje personale apo politike të Ballukut, por si një çështje parimore mbi ndarjen e pushteteve. Për kryeministrin, hetimi nuk përbën dënim dhe pezullimi nuk barazohet me shkarkim, ndërsa çështja Balluku është shndërruar në një test për kufijtë mes pushtetit ekzekutiv dhe atij gjyqësor, duke e kthyer këtë situatë në një debat institucional më të gjerë.