Kanë kaluar vetëm 24 orë që kur Kiara Tito, moderatorja e emisionit Fan Club, tregoi publikisht një kusht me nota humori që i kishte vendosur bashkëshortit të saj, Luiz Ejlli, pak para hyrjes së tij në shtëpinë e Big Brother VIP Albania. Kiara kishte kërkuar që Luizi të mos shfaqej më pa bluzë, duke e quajtur tashmë një “burrë të martuar”.
Megjithatë, duket se zakonet e vjetra janë të vështira për t’u lënë pas. Mbrëmjen e kaluar, Luizi është parë sërish duke lëvizur lirshëm në shtëpi pa bluzë, duke thyer premtimin e bërë vetëm disa orë më parë. Situata nuk kaloi pa u vënë re nga ndjekësit, të cilët reaguan menjëherë në rrjetet sociale me meme dhe montazhe humoristike, duke e quajtur episodin “dështimin e parë” të Kiarës për të vendosur rregull.
Vetë Kiara reagoi me sportivitet dhe humor, duke ripostuar në Instagram një foto që evidentonte “shkeljen” e rregullit, të shoqëruar me një emoji të përlotur. Dinamika spontane dhe lozonjare e çiftit mbetet ajo që publiku ka dashur gjithmonë, një marrëdhënie pa filtra, plot momente të qeshura, të cilat vazhdojnë të argëtojnë ndjekësit në çdo episod.