Henrik Hoxhaj ka dhënë dëshmi në GJKKO lidhur me atentatin ndaj vëllezërve Besmir dhe Viktor Haxhia, të ndodhur gjatë pandemisë Covid-19. Ai deklaroi se diskutimet për vrasjen janë bërë me Nuredin Dumanin, i cili shprehej i shqetësuar se po i atribuoheshin ngjarje kriminale që nuk i kishte kryer. Sipas Hoxhajt, objektivi fillestar lidhej edhe me Altin Ndocin, por vështirësitë për ta gjurmuar çuan në ndryshim plani. U vendos që shënjestër të ishte Besmir Haxhia.
Hoxhaj tregoi se ekzekutorë do të ishin ai dhe Nuredin Dumani, ndërsa shofer ishte Klevis Alla. Ai përshkroi përgatitjet, armët e përdorura dhe veshjet që imitonin OFL-në. Sipas tij, atentati u krye në zonën e Shënavlashit, pasi u konstatua se Besmir Haxhia ndodhej në makinë me vëllanë e tij. Pas një ndjekjeje të shkurtër, automjeti i viktimave u bllokua në trafik dhe autorët hapën zjarr.
Pas ngjarjes, Hoxhaj deklaroi se janë larguar drejt Tiranës, ndërsa sendet e përdorura janë hedhur dhe makina është larguar nga shoferi. Ai pohoi se për këtë atentat ka përfituar shumën prej 35 mijë eurosh. Hoxhaj shtoi se u shqetësua pas arrestimit të Klevis Allës, por sipas tij Dumani e kishte siguruar se situata ishte nën kontroll. Ai mohoi çdo komunikim me persona të tjerë të përfshirë në dosje.